അഞ്ചുവർഷത്തേക്ക് ലൈസൻസ് സറണ്ടർ ചെയ്താൽ 25,000 യൂറോ നഷ്ടപരിഹാരം; പദ്ധതിയുമായി മാൾട്ടീസ് സർക്കാർ
അഞ്ച് വർഷത്തേക്ക് ലൈസൻസ് ഉപേക്ഷിക്കുന്ന ഡ്രൈവർമാർക്ക് 25,000 യൂറോ നഷ്ടപരിഹാരം നൽകാൻ പദ്ധതിയുമായി മാൾട്ടീസ് സർക്കാർ. മാൾട്ടയിലെ റോഡുകളിലെ കാറുകളുടെ എണ്ണം കുറയ്ക്കുക എന്ന ലക്ഷ്യത്തോടെ നടപ്പാക്കുന്ന ഗതാഗത നയത്തിന്റെ ഭാഗമാണ് ഈ തീരുമാനമെന്ന് ടൈംസ് ഓഫ് മാൾട്ട റിപ്പോർട്ട് ചെയ്തു. മന്ത്രിസഭ ഇതിനകം തന്നെ ഈ നടപടി അംഗീകരിച്ചിട്ടുണ്ടെങ്കിലും അതിന്റെ ചില വിശദാംശങ്ങൾ ഇപ്പോഴും പുറത്തുവിടാനുണ്ടെന്ന് വൃത്തങ്ങൾ പറഞ്ഞു.
കുറഞ്ഞത് ഏഴ് വർഷമായി മാൾട്ടയിൽ വാഹനമോടിക്കുന്ന കാർ സ്വന്തമായുള്ള ലൈസൻസ് ഉടമകൾക്ക് ലൈസൻസ് ഉപേക്ഷിക്കുന്നതിന് പകരമായിട്ടാണ് അഞ്ച് വർഷത്തേക്ക് പ്രതിവർഷം 5,000 യൂറോ നൽകുക. ലൈസൻസ് വേണ്ടെന്ന് വയ്ക്കുന്ന കാലഘട്ടത്തിൽ അത് തിരികെ എടുക്കാൻ തീരുമാനിച്ചാൽ പിഴ ഈടാക്കും. മോട്ടോർ ബൈക്കുകൾ, വാണിജ്യ വാനുകൾ, മറ്റ് അത്തരം വാഹനങ്ങൾ എന്നിവ ഒഴിവാക്കപ്പെടും – പാസഞ്ചർ കാറുകൾക്ക് മാത്രമേ ഈ നടപടി ബാധകമാകൂ. ഏഴ് വർഷത്തെ പരിചയമുള്ള എല്ലാ കാർ ഉടമകൾക്കും പ്രായം കണക്കിലെടുക്കാതെ ഇത് ബാധകമാക്കും . മാൾട്ടീസ് പൗരന്മാർ പ്രാഥമിക ഗുണഭോക്താക്കളാകണമെന്ന് നയരൂപീകരണക്കാർ സ്വകാര്യമായി പറയുന്നുണ്ടെങ്കിലും നിബന്ധനകൾ ബാധകമായ എല്ലാവർക്കും ഈ നയത്തിന്റെ ഭാഗമായി മാറാൻ കഴിഞ്ഞേക്കും.
അപേക്ഷകർക്കുള്ള പേയ്‌മെന്റ് ഏത് രൂപത്തിലായിരിക്കുമെന്നത് ഇതുവരെ വ്യക്തമല്ല. ഗ്രാന്റുകളുടെ രൂപത്തിലോ നികുതി ഇളവുകളായോ നൽകാനും ആലോചിക്കുന്നുണ്ട്.ഈ വർഷം തന്നെ നടപടി അവതരിപ്പിക്കാൻ താൽപ്പര്യമുണ്ടെന്ന് സർക്കാർ വൃത്തങ്ങൾ അറിയിച്ചു. ഗതാഗത മന്ത്രി ക്രിസ് ബോണറ്റ് വാഗ്ദാനം ചെയ്ത ഗതാഗതം കുറയ്ക്കുന്നതിനുള്ള നടപടികളുടെ ആദ്യ ഘട്ട രൂപീകരണത്തിൽ ഈ നയവും ഉൾപ്പെടുന്നു. 18 മാസ കാലയളവിൽ നടപടികൾ തുടരും, മൊത്തത്തിൽ ദശലക്ഷക്കണക്കിന് യൂറോ ചിലവാകുമെന്ന് പ്രതീക്ഷിക്കുന്നു. ഡ്രൈവർമാർക്ക് ലൈസൻസ് സറണ്ടർ ചെയ്യാൻ പണമായി പ്രോത്സാഹനം നൽകുന്നത് ആഗോളതലത്തിൽ തന്നെ അസാധാരണമായ ഒരു നീക്കമാണ്. കഴിഞ്ഞ വർഷം അവസാനത്തോടെ, മാൾട്ടയിൽ രജിസ്റ്റർ ചെയ്ത 445,711 മോട്ടോർ വാഹനങ്ങളിൽ 70 ശതമാനത്തിലധികവും (313,665 എണ്ണം) സ്വകാര്യ കാറുകളായിരുന്നുവെന്ന് നാഷണൽ സ്റ്റാറ്റിസ്റ്റിക്സ് ഓഫീസ് ഡാറ്റ കാണിക്കുന്നു – ഒരു ദശാബ്ദം മുമ്പ്, 2014 ലെ ഇതേ കണക്കിനേക്കാൾ 20 ശതമാനം വർധനയാണ് ഉള്ളത്. ഈ കാർ പെരുപ്പം കുറയ്ക്കാനാണ് സർക്കാർ നീക്കം.
