കൊച്ചി മെട്രോ ട്രാക്കിൽനിന്നും ചാടിയ യുവാവ് മരിച്ചു, അന്വേഷണം പ്രഖ്യാപിച്ച് കെഎംആർഎൽ

കൊച്ചി :  മെട്രോ ട്രാക്കിൽനിന്ന്​ ചാടിയ  യുവാവ്  മരിച്ചു. മലപ്പുറം തിരൂരങ്ങാടി ചുള്ളിപ്പാറ വീരാശേരി നിസാറാണ്​ (32) മരിച്ചത്. വ്യാഴം പകൽ രണ്ടരയോടെയാണ് സംഭവം.വടക്കേകോട്ട മെട്രോ സ്റ്റേഷന്റെ ആലുവ ഭാഗത്തേക്കുള്ള പ്ലാറ്റ്ഫോമിനു സമീപത്തെ എമർജൻസി പാസ് വേയിലൂടെയാണ്​ യുവാവ്​ ട്രാക്കിലേക്ക്​ എത്തിയത്.

വടക്കേകോട്ടയിൽനിന്ന്​ തൃപ്പൂണിത്തുറയ്ക്ക് ടിക്കറ്റെടുത്തശേഷം പ്ലാറ്റ്ഫോമിൽ കടന്ന യുവാവ്, പ്ലാറ്റ്ഫോമും മറികടന്ന് മുന്നിലേക്ക്​ പോകുകയായിരുന്നു. മെയിന്റനൻസ് ജോലിക്കാരുംമറ്റും കടന്നുപോകുന്ന ഈ ഭാഗത്തുകൂടി യുവാവ് കടന്നുപോയത് ആദ്യം ആരും കണ്ടിരുന്നില്ല. പിന്നീട് യുവാവ് ട്രാക്കിലേക്ക്​ പ്രവേശിക്കുന്നത് കണ്ടതോടെ മെട്രോ അധികൃതർ വൈദ്യുതിബന്ധം വിച്ഛേദിച്ച് ട്രെയിൻ സർവീസ് നിർത്തി. തുടർന്ന്​ മെട്രോ അധികൃതർ പൊലീസിനെയും അഗ്നി രക്ഷാസേനയെയും വിവരം അറിയിക്കുകയായിരുന്നു.

പാലത്തിന്റെ കൈവരിയിൽ പിടിച്ച് താഴേക്ക്​ ചാടാനായി നിൽക്കുന്ന യുവാവിനെ കണ്ട്, താഴെ കൂടിയ നാട്ടുകാരുംമറ്റും പിന്തിരിപ്പിക്കാൻ ശ്രമിച്ചെങ്കിലും വിജയിച്ചില്ല. അഗ്നി രക്ഷാസേനാംഗങ്ങൾ താഴെ നെറ്റ് വിരിച്ചുനിന്നു. ഇതിനിടെ രണ്ട് അഗ്നി രക്ഷാസേനാ ഉദ്യോഗസ്ഥർ യുവാവിനെ അനുനയിപ്പിക്കാനായി ട്രാക്കിലൂടെ നടന്ന് അടുത്തെത്തിയപ്പോഴേക്കും യുവാവ്​ ചാടുകയായിരുന്നു. ഗുരുതര പരിക്കേറ്റതിനെ തുടർന്ന്​ ഉടൻ സമീപത്തെ ആശുപത്രിയിലും തുടർന്ന് എറണാകുളത്തെ സ്വകാര്യ ആശുപത്രിയിലും എത്തിച്ചെങ്കിലും മരിച്ചു. അച്ഛൻ: കുഞ്ഞിമൊയ്തീൻ. അമ്മ: സുലൈഖ. സഹോദരങ്ങൾ: ഫൈസൽ, റംഷീദ്, സഫീന.

വടക്കേകോട്ട മെട്രോ സ്​റ്റേഷനുസമീപം വയഡക്ടില്‍നിന്ന് യുവാവ് റോഡിലേക്ക് ചാടി മരിക്കാനിടയായ സംഭവത്തെക്കുറിച്ച് വിശദ അന്വേഷണം നടത്തുമെന്ന്​ കെഎംആർഎൽ. ഡയറക്ടറുടെ (സിസ്റ്റംസ്) നേതൃത്വത്തില്‍ വിശദമായ അന്വേഷണം നടത്തി സുരക്ഷാസംവിധാനം കൂടുതല്‍ ശക്തമാക്കും. സംഭവത്തെ തുടർന്ന്​ കടവന്ത്രമുതല്‍ തൃപ്പൂണിത്തുറവരെ പാതയില്‍ 40 മിനിറ്റോളം മെട്രോ സര്‍വീസ് നിര്‍ത്തിവച്ചതായും കെഎംആർഎൽ വാർത്താക്കുറിപ്പിൽ പറഞ്ഞു.