മെസിക്ക് ഹാട്രിക്ക് : ലോകകപ്പ് യോഗ്യതാ മത്സരത്തിൽ അർജന്‍റീനയ്ക്ക് ഗംഭീര ജയം
ബ്യൂണസ് ഐറിസ് : സൂപ്പർ താരം ലയണൽ മെസി ഹാട്രിക്ക് നേടി തിളങ്ങിയ ലോകകപ്പ് യോഗ്യതാ മത്സരത്തിൽ ഗംഭീര ജയം നേടി അർജന്‍റീന.ബൊളീവിയയെ എതിരില്ലാത്ത ആറ് ഗോളുകൾക്കാണ് ലോക ചാന്പ്യൻമാർ തകർത്തത്. മെസിക്ക് പുറമെ ലൗട്ടാരോ മാർട്ടിനെസ്, ജൂലിയൻ അൽവാരസ്, തിയാഗോ അൽമാഡ എന്നിവരാണ് അർജന്‍റീനയ്ക്കായി ഗോളുകൾ നേടിയത്.
മത്സരത്തിന്‍റെ 19, 84, 86 മിനിറ്റികളിലാണ് മെസി ഗോളുകൾ നേടിയത്. മാർട്ടിനെസ് 43-ാം മിനിറ്റിലും അൽവാരസ് ആദ്യ പകുതിയുടെ ഇഞ്ചുറി സമയത്തും അൽമാഡ 69-ാം മിനിറ്റിലും ആണ് ഗോളുകൾ സ്കോർ ചെയ്തത്.
വിജയത്തോടെ തെക്കേ അമേരിക്കൻ ടീമുകളുടെ ലോകകപ്പ് യോഗ്യതാ മത്സരങ്ങളുടെ പട്ടികയിൽ ഒന്നാം സ്ഥാനം നിലനിർത്തി. 10 മത്സരങ്ങളിൽ നിന്ന് 22 പോയന്‍റാണ് മെസിക്കും സംഘത്തിനുമുള്ളത്. 19 പോയിന്‍റുള്ള കൊളംബിയയാണ് രണ്ടാമത്.
