യുഎസിൽ നിന്ന് എല്ലാ ഇന്ത്യൻ വംശജരെയും നാടുകടത്തണം; പത്രപ്രവർത്തകന്റെ പോസ്റ്റ്

ന്യൂയോർക്ക് : യുഎസിൽ ഇന്ത്യൻ വംശജർക്കെതിരെ വർദ്ധിച്ചുവരുന്ന ഭീഷണികൾക്കിടയിൽ വിദ്വേഷ പരാമർശങ്ങളുമായി അമേരിക്കൻ പത്രപ്രവർത്തകനും വലതുപക്ഷ ആക്ടിവിസ്റ്റുമായ മാറ്റ് ഫോർണി. 2026 ൽ ഇന്ത്യക്കാരെയും ഹിന്ദു ക്ഷേത്രങ്ങളെയും ലക്ഷ്യമിട്ടുള്ള ആക്രമണങ്ങൾ നടക്കുമെന്ന് മാറ്റ് ഫോർണി മുന്നറിയിപ്പ് നൽകി. അമേരിക്കയിൽ താമസിക്കുന്ന എല്ലാ ഇന്ത്യൻ വംശജരെയും നാടുകടത്തണമെന്ന് ഫോർണി ആവശ്യപ്പെട്ടു.

2026 ൽ അമേരിക്കയിലെ ഇന്ത്യക്കാരോടുള്ള വിദ്വേഷം അതിന്റെ ഉച്ചസ്ഥായിയിലെത്തുമെന്നും ഇന്ത്യൻ വംശജരായ ആളുകൾ, അവരുടെ വീടുകൾ, ബിസിനസുകൾ, ക്ഷേത്രങ്ങൾ എന്നിവ വ്യാപകമായ അക്രമത്തിന് വിധേയമാകുമെന്നും അദ്ദേഹം തന്റെ സോഷ്യൽ മീഡിയ പോസ്റ്റിൽ അവകാശപ്പെട്ടു. എന്നാൽ വിവാദമായതോടെ അദ്ദേഹം പോസ്റ്റ് ഡിലീറ്റ് ചെയ്തു.

ഇന്ത്യൻ-അമേരിക്കൻ വംശജരുടെ ജീവൻ രക്ഷിക്കാനും രാജ്യത്ത് ഐക്യം നിലനിർത്താനും അവരെയെല്ലാം ഇന്ത്യയിലേക്ക് തിരിച്ചയക്കണമെന്ന് ഫോർണി പറഞ്ഞു. എല്ലാ ഇന്ത്യക്കാരെയും നാടുകടത്തണം. ഈ ആക്രമണങ്ങൾ വെള്ളക്കാരല്ല, ആഫ്രിക്കൻ-അമേരിക്കക്കാർ, ഹിസ്പാനിക് വംശജർ, പാകിസ്ഥാൻ വംശജർ എന്നിവരായിരിക്കും നടത്തുന്നതെന്നും ഫോർണി അവകാശപ്പെട്ടു. ഇത്തരം ഹീനമായ കുറ്റകൃത്യങ്ങൾ അടിച്ചമർത്താൻ മാധ്യമങ്ങൾ ശ്രമിക്കുമെന്ന് അദ്ദേഹം ആരോപിച്ചു. അതിനാൽ എല്ലാ ഇന്ത്യക്കാരെയും നാടുകടത്തുക എന്നതാണ് ഏക പരിഹാരം.

അമേരിക്കയിലെ കുടിയേറ്റത്തെ വളരെക്കാലമായി എതിർക്കുന്നയാളാണ് ഫോർണി. കൂടാതെ ഇന്ത്യാ വിരുദ്ധ പരാമർശങ്ങൾ ഇടയ്ക്കിടെ നടത്താറുമുണ്ട്. ഇന്ത്യക്കാർക്കെതിരെ പ്രസ്താവനകൾ നടത്തിയതിന് മുമ്പ് അദ്ദേഹത്തെ ജോലിയിൽ നിന്ന് പുറത്താക്കിയിട്ടുണ്ട്.

മാറ്റ് ഫോർണി ഒരു അമേരിക്കൻ കോളമിസ്റ്റും, എഴുത്തുകാരനും, പത്രപ്രവർത്തകനുമാണ്. സോഷ്യൽ മീഡിയ പ്ലാറ്റ്‌ഫോമായ എക്‌സിലൂടെ ഇന്ത്യക്കാർക്കെതിരെ ഫോർണി വിദ്വേഷം പ്രചരിപ്പിക്കുന്നതും അവരെ നാടുകടത്തണമെന്ന് ആഹ്വാനം ചെയ്യുന്നതും ഇതാദ്യമായല്ല. എച്ച്-1ബി വിസ പ്രോഗ്രാമിനെക്കുറിച്ചും ഇന്ത്യൻ പ്രശ്‌നങ്ങളെക്കുറിച്ചും റിപ്പോർട്ട് ചെയ്യാൻ അദ്ദേഹം നിയമിച്ചിരുന്ന ദി ബ്ലേസ് എന്ന അമേരിക്കൻ മാധ്യമത്തിൽ നിന്നും അടുത്തിടെ അദ്ദേഹത്തെ പുറത്താക്കി.

ഇ-കൊമേഴ്‌സ് പ്ലാറ്റ്‌ഫോമായ എറ്റ്‌സിയുടെ സിഇഒ ആയി നിയമിതയായ ഇന്ത്യൻ-അമേരിക്കൻ വംശജ കൃതി പട്ടേൽ ഗോയലിനെതിരെയും ഫോർണി അടുത്തിടെ അധിക്ഷേപകരമായ പരാമർശങ്ങൾ നടത്തിയിരുന്നു. “മറ്റൊരു കഴിവുകെട്ട ഇന്ത്യക്കാരി ഒരു അമേരിക്കൻ കമ്പനി ഏറ്റെടുത്തിരിക്കുന്നു, അവരുടെ ആദ്യപടി എല്ലാ അമേരിക്കക്കാരെയും പിരിച്ചുവിട്ട് പകരം ഇന്ത്യക്കാരെ നിയമിക്കുക എന്നതായിരിക്കുമെന്ന് ഞാൻ ഉറപ്പ് നൽകുന്നു. എല്ലാ ഇന്ത്യക്കാരെയും നാടുകടത്തുക” എന്ന് അദ്ദേഹം പറഞ്ഞു.

നവംബറിലെ സിഎൻഎൻ റിപ്പോർട്ട് അനുസരിച്ച്, കഴിഞ്ഞ വർഷം എക്സിൽ ഇന്ത്യൻ വിരുദ്ധ അഭിപ്രായങ്ങൾ വർദ്ധിച്ചതായി സെന്റർ ഫോർ ദി സ്റ്റഡി ഓഫ് ഓർഗനൈസ്ഡ് ഹേറ്റിലെ ഗവേഷകർ റിപ്പോർട്ട് ചെയ്തു. ഒക്ടോബറിൽ മാത്രം ഏകദേശം 2,700 പോസ്റ്റുകൾ ഇന്ത്യക്കാർക്കും ഇന്ത്യൻ-അമേരിക്കക്കാർക്കുമെതിരെ വംശീയതയും വിദേശീയ വിദ്വേഷവും പ്രോത്സാഹിപ്പിച്ചിരുന്നു.