ബോൾട്ട് ഫുഡ് ഡെലിവറിക്കാരുടെ സമരം നീളുന്നു, സമരം നടക്കുന്നത് ബോണസ് സ്‌കീം നിർത്തലാക്കിയതിനെതിരെ
ബോള്‍ട്ട് ഫുഡ് ഡെലിവറിക്കാരുടെ സമരം രണ്ടാം ദിവസത്തിലേക്ക് കടന്നു. 345 ഓളം ഫുഡ് ഡെലിവറിക്കാര്‍ സമരരംഗത്തുണ്ടെന്നാണ് വിവരം. ഓണ്‍ലൈനില്‍ ഭക്ഷണം ഓര്‍ഡര്‍ ചെയ്തിട്ട് ഓര്‍ഡര്‍ ഡെലിവറി ചെയ്തില്ലെന്ന പരാതിയുമായി നിരവധി പേരാണ് മാള്‍ട്ടയിലെ സാമൂഹ്യമാധ്യമങ്ങളില്‍ പോസ്റ്റിടുന്നത്. അതിനിടെ, സമരം ചെയ്യുന്ന ബോള്‍ട്ട് ഡെലിവറിക്കാരോട് ഏതെങ്കിലും യൂണിയനില്‍ ചേര്‍ന്ന് സംയുക്തമായി സമര രംഗത്തേക്ക് ഇറങ്ങാന്‍ മാള്‍ട്ട തൊഴില്‍ മന്ത്രി ബ്രയോണ്‍ കമില്ലേരി പറഞ്ഞു.
ശനിയാഴ്ച വൈകുന്നേരം 4 മണിക്ക് ആരംഭിച്ച പണിമുടക്ക് തുടരുകയാണെന്ന് ഞായറാഴ്ചയും തുടര്‍ന്നു. വാരാന്ത്യ ബോണസ് വെട്ടിക്കുറച്ചതിനെതിരെയാണ് സമരം നടക്കുന്നത്.’സാധാരണ ദിവസങ്ങളില്‍ ഞങ്ങള്‍ എല്ലാ ഡെലിവറിയിലും €2 ഉണ്ടാക്കും, വെള്ളി, ശനി, ഞായര്‍ ദിവസങ്ങളില്‍ – പ്ലാറ്റ്ഫോം ഏറ്റവും തിരക്കുള്ളപ്പോള്‍ – ഇത് € 4 അല്ലെങ്കില്‍ € 4.50 ആയി ഉയരും.എന്നാല്‍ ഈ ബോണസ് സ്‌കീം ബോള്‍ട്ട് റദ്ദാക്കി, ഞങ്ങള്‍ക്ക് ആഴ്ചയിലുടനീളം ഒരേ നിരക്കാണ് നിലവില്‍ ലഭിക്കുന്നത്.’-തൊഴിലാളികള്‍ ചൂണ്ടിക്കാട്ടി. 2023 ജനുവരി മുതല്‍ പ്രാബല്യത്തില്‍ വന്ന ഡിജിറ്റല്‍ പ്ലാറ്റ്ഫോം ഡെലിവറി വേജസ് കൗണ്‍സില്‍ വേജ് റെഗുലേഷന്‍ ഓര്‍ഡര്‍ അനുസരിച്ച്, കൊറിയര്‍മാര്‍ക്ക് മിനിമം വേതനം, ഓവര്‍ടൈം, വിശ്രമ ദിവസങ്ങളില്‍ ഇരട്ട ശമ്പളം, അസുഖം, പരിക്കുകള്‍, അവധിക്കാല അവധികള്‍,
ഉപകരണങ്ങള്‍ക്കും ഇന്ധനത്തിനും പണം നല്‍കുന്നതില്‍ നിന്നുള്ള ഇളവ് എന്നിവ ഉറപ്പുനല്‍കാന്‍ പ്ലാറ്റ് ഫോമുകള്‍ക്ക് നിര്‍ദേശമുണ്ട്. എന്നാല്‍, നിലവില്‍ മാള്‍ട്ടയില്‍ നിലവിലുള്ള കുറഞ്ഞ മണിക്കൂര്‍ വേതനമായ 4.82 യൂറോ പോലും അവര്‍ക്ക് ലഭിക്കുന്നില്ല.
