സർക്കാർ പദ്ധതികൾ നിലനിൽക്കെ വീട് വാങ്ങൽ അതികഠിനം : പിഎൻ നേതാവ് അലക്സ് ബോർഗ്
വർഷങ്ങളായി സർക്കാർ വിവിധ ഭവന പദ്ധതികൾ അവതരിപ്പിക്കുന്നുണ്ടെങ്കിലും, സ്വന്തമായി ഒരു വീട് വാങ്ങുക എന്നത് എക്കാലത്തെയും വലിയ വെല്ലുവിളിയായി മാറിയിരിക്കുകയാണെന്ന് നാഷണലിസ്റ്റ് പാർട്ടി നേതാവ് അലക്സ് ബോർഗ് പറഞ്ഞു. താങ്ങാനാവുന്ന ഭവനങ്ങളെക്കുറിച്ച് (Affordable housing) ഞായറാഴ്ച സംഘടിപ്പിച്ച ചർച്ചയിൽ സംസാരിക്കവെ, വീട് വാങ്ങാൻ ആഗ്രഹിക്കുന്നവർ നേരിടുന്ന രൂക്ഷമായ സാമ്പത്തിക, ഭരണപരമായ തടസ്സങ്ങൾ അദ്ദേഹം എടുത്തുപറഞ്ഞു.
ബജറ്റിന് മുന്നോടിയായി സാമൂഹിക പങ്കാളികളുമായും ബന്ധപ്പെട്ട വിദഗ്ദ്ധരുമായും പാർട്ടി നടത്തുന്ന കൂടിയാലോചനകളുടെ ഭാഗമായാണ് ഈ ചർച്ച സംഘടിപ്പിച്ചത്.
കഴിഞ്ഞ ഒരു വർഷത്തിനിടെ വസ്തുവിലയിൽ ഏകദേശം 7 ശതമാനത്തിന്റെ വർദ്ധനവുണ്ടായപ്പോൾ, കുടുംബ വരുമാനത്തിൽ ശരാശരി 4 ശതമാനത്തിന്റെ വർദ്ധനവ് മാത്രമാണ് ഉണ്ടായിട്ടുള്ളതെന്ന് ഭവന നിർമ്മാണ മേഖലയുടെ ഷാഡോ മന്ത്രി സ്റ്റാൻലി സാമിറ്റ് ചൂണ്ടിക്കാട്ടി. വസ്തുവിലയും വരുമാന വളർച്ചയും തമ്മിലുള്ള ഈ വലിയ വ്യത്യാസമാണ് വീട് സ്വന്തമാക്കുന്നത് അസാധ്യമാക്കുന്നതെന്ന് അദ്ദേഹം വാദിച്ചു.
യുവ ദമ്പതികളെ മാത്രമല്ല, ഒറ്റയ്ക്ക് ജീവിക്കുന്നവർ, വേർപിരിഞ്ഞവർ, ചെറിയ വീടുകളിലേക്ക് മാറാൻ ആഗ്രഹിക്കുന്ന മുതിർന്ന പൗരന്മാർ എന്നിവരെയും ഈ സാമ്പത്തിക പ്രതിസന്ധി സാരമായി ബാധിക്കുന്നുണ്ടെന്ന് ബോർഗ് വ്യക്തമാക്കി.
പ്രശ്നപരിഹാരത്തിനായി വർഷങ്ങളോളം കാത്തിരിക്കാൻ ജനങ്ങൾക്ക് കഴിയില്ലെന്ന് ഓർമ്മിപ്പിച്ച ബോർഗ്, വീട് വാങ്ങലുമായി ബന്ധപ്പെട്ട വിവിധ അതോറിറ്റികളിലെ ചുവപ്പുനാട കുരുക്കുകൾ അഴിക്കാൻ കാര്യക്ഷമമായ ‘വൺ-സ്റ്റോപ്പ് ഷോപ്പ്’ സംവിധാനം ഏർപ്പെടുത്തണമെന്ന് ആവശ്യപ്പെട്ടു. “രാജ്യത്തിന്റെ സാമ്പത്തിക വളർച്ചയുടെ പ്രയോജനം എല്ലാവരിലേക്കും എത്തണമെങ്കിൽ, സ്വന്തമായി വീട് വാങ്ങാൻ ആഗ്രഹിക്കുന്നവർക്ക് അതിനുള്ള അവസരം ഉറപ്പാക്കണം,” ബോർഗ് കൂട്ടിച്ചേർത്തു.
ആൻഡ്രൂ കമെൻസുലി മോഡറേറ്ററായ ചർച്ചയിൽ എസ്റ്റേറ്റ് ഏജന്റും മാൾട്ട ഡെവലപ്പേഴ്സ് അസോസിയേഷൻ അംഗവുമായ ആൻഡ്രൂ ബുഗെജ, കെ.എസ്.യു സോഷ്യൽ പോളിസി ഓഫീസർ ജൂലി ആൻ കാമിലേരി, കാമ്ര തൽ-പെരിറ്റി പ്രസിഡന്റ് ആന്ദ്രേ പിസ്സുട്ടോ, ഫാമിലി ലോയർ സ്റ്റീഫൻ തേക്ക് എന്നിവരും പങ്കെടുത്തു.
