ഡെമോക്രാറ്റുകൾ അധികാരത്തിൽ വന്നാൽ 1929 മോഡൽ സാമ്പത്തിക മാന്ദ്യത്തിലേക്ക് കൂപ്പുകുത്തും : ട്രംപ്
ഒഹായോ : വരാനിരിക്കുന്ന മിഡ് ടേം തിരഞ്ഞെടുപ്പിൽ റിപ്പബ്ലിക്കൻ പാർട്ടിക്ക് വിജയിക്കാനായില്ലെങ്കിൽ അമേരിക്ക 1929-ലേതിന് സമാനമായ വലിയ സാമ്പത്തിക മാന്ദ്യത്തിലേക്ക് കൂപ്പുകുത്തുമെന്ന് യു.എസ് പ്രസിഡന്റ് ഡൊണാൾഡ് ട്രംപ്. ഒഹായോയിലെ പ്രചാരണ റാലിയിലാണ് ട്രംപിന്റെ മുന്നറിയിപ്പ്. തിരഞ്ഞെടുപ്പിൽ റിപ്പബ്ലിക്കൻ പാർട്ടി ജനപ്രതിനിധി സഭയിലും യു.എസ് സെനറ്റിലും ഭൂരിപക്ഷം നേടിയാൽ രാജ്യത്തെ എല്ലാ മുതിർന്ന പൗരന്മാർക്കും 5,000 ഡോളർ വീതം നൽകുമെന്നും ട്രംപ് പ്രഖ്യാപിച്ചു.
താരിഫുകളിൽ നിന്നും മറ്റ് സാമ്പത്തിക സ്രോതസ്സുകളിൽ നിന്നും രാജ്യത്തിന് വൻ തുക വരുമാനമായി ലഭിക്കുന്നുണ്ടെന്നും, അതിനാൽ റിപ്പബ്ലിക്കൻ പാർട്ടി വിജയിച്ചാൽ എല്ലാ മുതിർന്ന പൗരന്മാർക്കും 5,000 ഡോളർ വീതം നൽകാൻ തങ്ങൾക്ക് സാധിക്കുമെന്നും ട്രംപ് അവകാശപ്പെട്ടു. എന്നാൽ ഡെമോക്രാറ്റുകൾ അധികാരത്തിൽ വന്നാൽ രാജ്യത്തിന്റെ സാമ്പത്തിക അടിത്തറ തകരുമെന്ന് അദ്ദേഹം കുറ്റപ്പെടുത്തി. കഴിഞ്ഞ ഭരണകൂടത്തിന്റെ കാലത്ത് ഒബാമകെയർ വഴി ഏകദേശം 10 ലക്ഷത്തോളം കുടുംബങ്ങളിൽ നിന്ന് ഡെമോക്രാറ്റുകൾ അധിക തുക ഈടാക്കിയെന്ന് ട്രംപ് ആരോപിച്ചു. ഈ തുക തിരികെ നൽകുന്നതിന്റെ ഭാഗമായി 500 ഡോളറിന്റെ റീഫണ്ട് ചെക്കുകൾ അയച്ചിട്ടുണ്ടെന്നും, ഒഹായോയിലെ 70,000 കുടുംബങ്ങൾക്ക് ഇതിന്റെ പ്രയോജനം ലഭിക്കുമെന്നും അദ്ദേഹം പറഞ്ഞു. കൂടാതെ യു.എസ് സൈനികർക്ക് 1,776 ഡോളർ വീതം നൽകിയ കാര്യവും അദ്ദേഹം ചൂണ്ടിക്കാട്ടി.
ഡാറ്റാ സെന്ററുകൾ കാരണം സാധാരണക്കാരുടെ വൈദ്യുതി നിരക്ക് ഉയരുന്നത് തടയുന്നതിനായി സെനറ്റർ ജോൺ ഹൂസ്റ്റൺ അവതരിപ്പിച്ച ‘റേറ്റ് പേയർ പ്രൊട്ടക്ഷൻ ആക്ട്’ ബില്ലിനെ ഡെമോക്രാറ്റുകൾ തടഞ്ഞതിനെ ട്രംപ് വിമർശിച്ചു. റിപ്പബ്ലിക്കൻമാർ വിജയിച്ചാൽ 24 മണിക്കൂറിനുള്ളിൽ ഈ ബില്ലിൽ ഒപ്പുവെക്കുമെന്ന് ട്രംപ് ഉറപ്പുനൽകി.
ആഗോളതാപനം എന്നത് തെറ്റായ പ്രചാരണമാണെന്ന് വാദിച്ച ട്രംപ്, വാദങ്ങൾ പൊളിഞ്ഞപ്പോഴാണ് ഡെമോക്രാറ്റുകൾ കാലാവസ്ഥാ വ്യതിയാനം എന്ന പദം ഉപയോഗിക്കാൻ തുടങ്ങിയതെന്ന് പരിഹസിച്ചു. ഡെമോക്രാറ്റുകൾ നികുതികൾ 5 ട്രില്യൺ ഡോളർ വരെ വർദ്ധിപ്പിക്കാനും, അതിർത്തികൾ തുറന്നുകൊടുക്കാനും, നിയമവിരുദ്ധ കുടിയേറ്റക്കാർക്ക് വോട്ടവകാശം നൽകി തിരഞ്ഞെടുപ്പ് അട്ടിമറിക്കാനും ശ്രമിക്കുകയാണെന്ന് ട്രംപ് ആരോപിച്ചു.
