അനധികൃത നിർമ്മാണം: സ്ലീമയിലെ ‘പിക്കോളോ പാദ്രെ’ റെസ്റ്റോറന്റിനെതിരെ നടപടിയുമായി പ്ലാനിംഗ് അതോറിറ്റി

സ്ലീമയിലെ ‘ദ സ്‌ട്രാൻഡ്’ സെൻട്രിക് ഹോട്ടലിലുള്ള പുതിയ ‘പിക്കോളോ പാദ്രെ’ റെസ്റ്റോറന്റിന് മുന്നിലെ അനധികൃത നിർമ്മാണങ്ങളും റോഡിൽ ടൈലുകൾ പാകിയതും ഉടനടി നീക്കം ചെയ്യാൻ പ്ലാനിംഗ് അതോറിറ്റി (PA) ഉത്തരവിട്ടു. 4, 5 ത്രീഖ് ഇൽ-ലൂൺസ്യാത, 20, 21 ഇക്സ്-ഷാറ്റ് എന്നിവിടങ്ങളിലെ നിർമ്മാണ പ്രവർത്തനങ്ങൾ ചൂണ്ടിക്കാട്ടി ‘EC/00122/26’ എന്ന എൻഫോഴ്‌സ്‌മെന്റ് നോട്ടീസാണ് അതോറിറ്റി പുറപ്പെടുവിച്ചിരിക്കുന്നത്.

നടപ്പാതയിലേക്കും റോഡിലേക്കും നീളുന്ന രീതിയിൽ തുണികൊണ്ടുള്ള മേൽക്കൂര നിർമ്മിച്ചതും, റോഡിൽ തൂൺ സ്ഥാപിച്ചതും, മേൽക്കൂരയ്ക്ക് താഴെയുള്ള റോഡിന്റെ ഒരു ഭാഗത്ത് ടൈലുകൾ പാകിയതും ചുറ്റും ചെടിച്ചട്ടികൾ വച്ചതുമാണ് കേസിന് ആധാരം. വ്യവസായി കാർലോ സ്റ്റിവാളയെയാണ് നിയമലംഘകനായി നോട്ടീസിൽ ചൂണ്ടിക്കാണിച്ചിരിക്കുന്നത്. പൊതുഭൂമിയിലെ നിർമ്മാണങ്ങൾ ഉൾപ്പെടുന്ന കേസുകളിൽ സാധാരണയായി ചെയ്യാറുള്ളതുപോലെ ലാൻഡ്‌സ് അതോറിറ്റി ചെയർപേഴ്‌സനെയും നോട്ടീസിൽ പ്രതിയാക്കിയിട്ടുണ്ട്.

നിർമ്മാണം നടന്നുകൊണ്ടിരിക്കെ സ്ലീമ ലോക്കൽ കൗൺസിൽ ഉൾപ്പെടെയുള്ളവരിൽ നിന്ന് നിരവധി പരാതികൾ ലഭിച്ചിരുന്നതായി അതോറിറ്റി അറിയിച്ചു. പൊതുസ്ഥല കൈയേറ്റം, കാൽനടയാത്രക്കാരുടെ സഞ്ചാര സ്വാതന്ത്ര്യം, റോഡ് സുരക്ഷ എന്നിവയെക്കുറിച്ചുള്ള ആശങ്കകളാണ് ഈ പരാതികളിൽ ഉയർന്നുവന്നത്. പരാതി ലഭിച്ച ഉടൻ തന്നെ നിർമ്മാണം നിർത്തിവെക്കാൻ ഉത്തരവിട്ടിരുന്നതായും തുടർന്നാണ് എൻഫോഴ്‌സ്‌മെന്റ് നോട്ടീസ് നൽകിയതെന്നും അതോറിറ്റി വ്യക്തമാക്കി. ഉത്തരവ് പാലിച്ചില്ലെങ്കിൽ ശക്തമായ നിയമനടപടികൾ സ്വീകരിക്കുമെന്നും പ്ലാനിംഗ് അതോറിറ്റി മുന്നറിയിപ്പ് നൽകി.

നേരത്തെ, ഒക്ടോബർ 1-ലെ വിവരങ്ങൾ അനുസരിച്ച് ‘പിക്കോളോ പാദ്രെ’ റെസ്റ്റോറന്റിന് ഈ നിർമ്മിതിക്ക് അനുമതി ലഭിച്ചിട്ടില്ലെന്നും, വീൽചെയർ ഉപയോഗിക്കുന്നവർക്കും കാഴ്ചപരിമിതിയുള്ളവർക്കും ഇത് വലിയ തടസ്സമാണെന്നും ചൂണ്ടിക്കാട്ടി സ്ലീമ ലോക്കൽ കൗൺസിലിന് വേണ്ടി അഭിഭാഷക ക്ലെയർ ബോണെല്ലോ പ്ലാനിംഗ് അതോറിറ്റിയുടെ എൻഫോഴ്‌സ്‌മെന്റ് ഡയറക്ടറേറ്റിന് കത്ത് അയച്ചിരുന്നു. ‘ആദ്യം നിർമ്മിക്കുക, പിന്നീട് അനുമതി നേടുക’ എന്ന രീതിയാണ് ഉടമ സ്വീകരിക്കുന്നതെന്നും, അതിനാൽ തന്നെ ഇത് പൂർണ്ണമായും പൊളിച്ചുനീക്കണമെന്നും അവർ ആവശ്യപ്പെട്ടു.

അതേസമയം, പ്രക്ഷോഭ സംഘടനയായ ‘മൂവ്‌മെന്റ് ഗ്രാഫിറ്റി’യും ശക്തമായ പ്രതിഷേധവുമായി രംഗത്തെത്തിയിട്ടുണ്ട്. ഒരാഴ്ചയ്ക്കകം നിർമ്മാണം പൊളിച്ചുനീക്കിയില്ലെങ്കിൽ നേരിട്ടുള്ള പ്രക്ഷോഭത്തിലേക്ക് കടക്കുമെന്ന് അവർ മുന്നറിയിപ്പ് നൽകി. സ്ലീമ റെസിഡന്റ്സ് അസോസിയേഷനും വിഷയത്തിൽ അടിയന്തര ഇടപെടൽ ആവശ്യപ്പെട്ടിട്ടുണ്ട്.