സ്പെയിനിലും പോർച്ചുഗലിലും മാരകമായ കാട്ടുതീ, ഒരു മരണം

സ്പെയിനിലും പോർച്ചുഗലിലും മാരകമായ കാട്ടുതീ . കടുത്ത ചൂടും ശക്തമായ കാറ്റും മൂലം നിരവധി പ്രദേശങ്ങളിലേക്ക് തീ പടരുന്ന നിലയാണ്. ആയിരക്കണക്കിന് ആളുകൾ വീടുകളിൽ നിന്നും പലായനം ചെയ്തുവെന്നാണ് റിപ്പോർട്ടുകൾ. മാഡ്രിഡിന് പ്രാന്തപ്രദേശമായ ട്രെസ് കാന്റോസിൽ ഒരാൾ കാട്ടുതീയിൽ പൊള്ളലേറ്റ് മരിച്ചെന്ന് ഉദ്യോഗസ്ഥർ സ്ഥിരീകരിച്ചു. ഉഷ്‌ണതരംഗം തുടരുന്നതിനാൽ വീണ്ടും തീപിടുത്തമുണ്ടാകാനുള്ള സാധ്യതയുണ്ടെന്ന് അധികൃതർ മുന്നറിയിപ്പ് നൽകി.

മണിക്കൂറിൽ 70 കിലോമീറ്റർ വേഗതയിൽ വീശുന്ന കാറ്റ് ജനവാസ മേഖലകളിലേക്കും തീ പടർത്തുന്നുണ്ട്. ട്രെസ് കാന്റോസിലെ തീ വിനാശകരമായ വേഗതയിലാണ് പടർന്നത്. വെറും 40 മിനിറ്റിനുള്ളിൽ ആറ് കിലോമീറ്റർ ദൂരം തീ പിടിച്ചതായി പ്രാദേശിക പരിസ്ഥിതി മേധാവി കാർലോസ് നോവില്ലോ പറഞ്ഞു. നൂറുകണക്കിന് താമസക്കാരെ ഒഴിപ്പിച്ചു, എന്നിരുന്നാലും ചൊവ്വാഴ്ച രാവിലെയോടെ തീ നിയന്ത്രണവിധേയമാക്കിയതായി ഉദ്യോഗസ്ഥർ പറഞ്ഞു. അൻഡലൂഷ്യയുടെ തെക്കൻ മേഖലയിൽ, മറ്റൊരു വലിയ തീപിടുത്തം ഉണ്ടായതിനെത്തുടർന്ന് ജനപ്രിയ തീരദേശ പട്ടണമായ താരിഫയ്ക്ക് സമീപമുള്ള ഹോട്ടലുകളിൽ നിന്നും വീടുകളിൽ നിന്നും ഏകദേശം 2,000 പേരെ ഒഴിപ്പിച്ചു. ഈ മാസം ആദ്യം മറ്റൊരു കാട്ടുതീ ഉണ്ടായ സ്ഥലത്തിന് സമീപമാണ് തീപിടുത്തമുണ്ടായതെന്ന് അധികൃതർ പറഞ്ഞു.

യൂറോപ്പിന്റെ ഭൂരിഭാഗവും റെക്കോർഡ് ഭേദിക്കുന്ന ഉഷ്ണതരംഗം ബാധിച്ചതിനാൽ, സ്പെയിനിലും അയൽരാജ്യമായ പോർച്ചുഗലിലും വിവിധ തീപിടുത്തങ്ങൾക്കെതിരെ അടിയന്തര സംഘങ്ങൾ പോരാടുകയാണ്. 44°C വരെ താപനില ഉയരുമെന്ന് പ്രതീക്ഷിക്കുന്ന ഉഷ്ണതരംഗം ബുധനാഴ്ച വരെയെങ്കിലും തുടരുമെന്ന് സ്പാനിഷ് കാലാവസ്ഥാ ഏജൻസി മുന്നറിയിപ്പ് നൽകി, ഇത് പുതിയ കാട്ടു തീക്കുള്ള സാധ്യത വർദ്ധിപ്പിക്കുന്നു. കുതിച്ചുയരുന്ന ചൂട്, വരണ്ട സസ്യങ്ങൾ, ശക്തമായ കാറ്റ് എന്നിവയുടെ സംയോജനം വരും ദിവസങ്ങളിൽ കൂടുതൽ വിനാശകരമായ തീപിടുത്തങ്ങൾക്ക് കാരണമാകുമെന്ന് വിദഗ്ധർ മുന്നറിയിപ്പ് നൽകി .