മേറ്റർ ഡീ ആശുപത്രിയിൽ പുതിയ ഏർലി പ്രെഗ്നൻസി യൂണിറ്റ് തുടങ്ങി
മേറ്റർ ഡീ ആശുപത്രിയിൽ പുതിയ ഏർലി പ്രെഗ്നൻസി യൂണിറ്റ് ആരംഭിച്ചു. ഇതോടെ ഗർഭധാരണ സംബന്ധമായ പ്രശനങ്ങൾ ഉള്ളവരെ ഗർഭിണികളിൽ നിന്നും പ്രസവം കഴിഞ്ഞവരിൽ നിന്നും മാറ്റി മറ്റൊരു വാർഡിൽ ചികിത്സിക്കാൻ കഴിയും.
ആരോഗ്യമന്ത്രി ജോ എറ്റിയെൻ അബേല തിങ്കളാഴ്ച യൂണിറ്റ് ഔദ്യോഗികമായി ഉദ്ഘാടനം ചെയ്തു.
പ്രത്യേക പരിശീലനം നേടിയ നഴ്‌സുമാരും മിഡ്‌വൈഫുമാരും ഉൾപ്പെടെ പരിശീലനം ലഭിച്ച 20 പ്രൊഫഷണലുകളുടെ ഒരു സംഘമാണ് യൂണിറ്റ് പ്രവർത്തിപ്പിക്കുക സേവനം അടുത്ത ആഴ്ച പ്രവർത്തനം ആരംഭിക്കും. പുതിയ യൂണിറ്റിൽ എട്ട് രോഗികളെ വിപുലമായ പരിചരണത്തിനും നിരീക്ഷണത്തിനുമായി ഉൾക്കൊള്ളാൻ കഴിയും. ഗർഭം അലസിപ്പോകൽ ആവർത്തിക്കുന്നവർക്കായി ഒരു ഔട്ട്‌പേഷ്യന്റ് ക്ലിനിക്കും ഇതിൽ ഉൾപ്പെടും. മാൾട്ടയിൽ പ്രതിദിനം മൂന്ന് പേർക്ക് ഗർഭം അലസൽ അനുഭവപ്പെടുന്നുണ്ടെന്നും, അതിന്റെ ഫലമായി പ്രതിവർഷം ഏകദേശം 400 രോഗികൾ മേറ്റർ ഡീ ആശുപത്രിയിൽ പ്രവേശിപ്പിക്കപ്പെടുന്നുണ്ടെന്നും ആരോഗ്യമന്ത്രി പറഞ്ഞു.
