മാൾട്ട-ദോഹ ഡയറക്ട് ഫ്‌ളൈറ്റ് സർവീസുമായി ഖത്തർ എയർവേയ്‌സ് എത്തുന്നു
ഖത്തർ എയർവേയ്‌സ് മാൾട്ടയിലേക്കുള്ള സർവീസ് പുനരാരംഭിക്കുന്നു. ജൂലൈ മുതലാണ് ഖത്തർ എയർവേയ്‌സ് മാൾട്ട സർവീസ് തുടങ്ങുക, ആഴ്ചയിൽ നാല് വിമാനം എന്ന ക്രമത്തിൽ സർവീസ് ആരംഭിക്കാനാണ് തീരുമാനം. ദോഹയിലെ ഹമദ് അന്താരാഷ്‌ട്ര വിമാനത്താവളത്തിലേക്ക് നേരിട്ട് കണക്ഷൻ ഫ്‌ളൈറ്റ് വരുന്നത് ഇന്ത്യക്കാർ അടക്കമുള്ള മാൾട്ടീസ് പ്രവാസലോകത്തിനും ഗുണകരമാകും.
ദോഹയിൽ, ഖത്തർ പ്രധാനമന്ത്രിയും വിദേശകാര്യ മന്ത്രിയുമായ ഷെയ്ഖ് മുഹമ്മദ് ബിൻ അബ്ദുൽറഹ്മാൻ അൽതാനി, ഖത്തർ എയർവേയ്‌സിൻ്റെ ചീഫ് എക്‌സിക്യൂട്ടീവ് ഓഫീസർ ഇംഗ് ബദർ മുഹമ്മദ് അൽ മീർ, ഖത്തർ ടൂറിസം ചെയർമാൻ സാദ് ബിൻ അലി അൽ ഖർജി എന്നിവരുമായി ടൂറിസം മന്ത്രി ഇയാൻ ബോർഗ് നടത്തിയ കൂടിക്കാഴ്ചയിലാണ് ഇക്കാര്യം തീരുമാനമായത്. മാൾട്ടയിലെ ഏറ്റവും വലിയ പ്രവാസികളുടെ ആസ്ഥാനമായ ഓസ്‌ട്രേലിയ ഉൾപ്പെടെയുള്ള മറ്റ് പല പ്രദേശങ്ങളുമായും മറ്റ് വളർന്നുവരുന്ന ടൂറിസം വിപണികളുമായും മാൾട്ടയുടെ കണക്റ്റിവിറ്റി വർദ്ധിക്കാൻ ഇത് സഹായിക്കും – ബോർഗ് കൂട്ടിച്ചേർത്തു. യൂറോപ്യൻ വിപണികളിലേക്കുള്ള കവാടമായും സുസ്ഥിര നവീകരണത്തിനുള്ള കേന്ദ്രമായും മാൾട്ടയെ പരിഗണിക്കണമെന്നും ബോർഗ് ഖത്തറി നിക്ഷേപകരോട് അഭ്യർത്ഥിച്ചു. ഖത്തർ എയർവേയ്‌സിൻ്റെ അന്താരാഷ്‌ട്ര കേന്ദ്രമായ ഹമദ് ഇൻ്റർനാഷണൽ എയർപോർട്ട് അഞ്ച് ഭൂഖണ്ഡങ്ങളിലായി 197 ലക്ഷ്യസ്ഥാനങ്ങളിലേക്ക് വിമാന സർവീസുകൾ നടത്തുന്നു.
