ജപ്പാനിലെ ഫാക്ടറിയിൽ കത്തിക്കുത്തും സ്പ്രേ ആക്രമണവും; 14 പേർക്ക് പരിക്ക്
ടോക്കിയോ : മധ്യ ജപ്പാനിലെ ഒരു ഫാക്ടറിയിലുണ്ടായ കത്തിക്കുത്തിൽ പതിനാല് പേർക്ക് പരിക്കേറ്റു. അക്രമി തൊഴിലാളികൾക്കെതിരെ തിരിച്ചറിയാത്ത ഒരു ദ്രാവകം പ്രയോഗിച്ചതായും അധികൃതർ അറിയിച്ചു. ടോക്കിയോയ്ക്ക് പടിഞ്ഞാറുള്ള ഷിസുവോക്ക പ്രിഫെക്ചറിലെ മിഷിമ നഗരത്തിലെ ഒരു റബ്ബർ ഫാക്ടറിയിലാണ് സംഭവം.
കത്തി ഉപയോഗിച്ച് ഒരാൾ നിരവധി തൊഴിലാളികളെ കുത്തിപ്പരിക്കേൽപ്പിച്ചതായി ക്യോഡോ ന്യൂസ് ഏജൻസിയും മറ്റ് ജാപ്പനീസ് മാധ്യമങ്ങളും റിപ്പോർട്ട് ചെയ്തു.
“അടിയന്തര സേവനങ്ങൾ 14 പേരെ ആശുപത്രിയിൽ എത്തിച്ചു,” മിഷിമ സിറ്റി അഗ്നിശമന വകുപ്പിലെ ഉദ്യോഗസ്ഥനായ ടോമോഹരു സുഗിയാമ പറഞ്ഞു.
പ്രാദേശിക സമയം വൈകുന്നേരം 4:30 ഓടെ “അഞ്ചോ ആറോ പേരെ ആരോ കുത്തിയതായി” അധികൃതർക്ക് അടിയന്തര കോൾ ലഭിച്ചതായി സുഗിയാമ പറഞ്ഞു, സംഭവസ്ഥലത്ത് ഒരു “സ്പ്രേ പോലുള്ള ദ്രാവകം” ഉപയോഗിച്ചതായി തെളിഞ്ഞു.
ഫാക്ടറിയിൽ നിന്ന് അക്രമിയെന്ന് സംശയിക്കുന്ന ഒരാളെ കസ്റ്റഡിയിലെടുത്തതായി ജാപ്പനീസ് മാധ്യമങ്ങൾ റിപ്പോർട്ട് ചെയ്തു. പരിക്കേറ്റവരുടെ അവസ്ഥ ഉൾപ്പെടെയുള്ള കൂടുതൽ വിവരങ്ങൾ ഉടനടി ലഭ്യമല്ല. സംഭവവുമായി ബന്ധപ്പെട്ട സാഹചര്യങ്ങൾ അധികൃതർ അന്വേഷിച്ചുവരികയാണ്.
കൊലപാതക നിരക്ക് കുറവും ലോകത്തിലെ ഏറ്റവും കർശനമായ തോക്ക് നിയന്ത്രണ നിയമങ്ങളുമുള്ള ജപ്പാനിൽ അക്രമ കുറ്റകൃത്യങ്ങൾ താരതമ്യേന അപൂർവമാണ്. എന്നാൽ മുൻ പ്രധാനമന്ത്രി ഷിൻസോ ആബെയുടെ 2022-ലെ കൊലപാതകം ഉൾപ്പെടെ, കത്തിക്കുത്തും വെടിവയ്പ്പും പോലുള്ള ഒറ്റപ്പെട്ട സംഭവങ്ങൾ റിപ്പോർട്ട് ചെയ്യാറുണ്ട്.
2023-ൽ വെടിവെപ്പും കത്തിക്കുത്തും ഉൾപ്പെട്ട ഒരു കൂട്ടക്കൊലയ്ക്ക് ഒരു ജാപ്പനീസ് പൗരനെ വധശിക്ഷയ്ക്ക് വിധിച്ചിരുന്നു. രണ്ട് പോലീസ് ഉദ്യോഗസ്ഥർ ഉൾപ്പെടെ നാല് പേർ അന്ന് കൊല്ലപ്പെട്ടിരുന്നു.
ഈ വർഷം ആദ്യം, മെയ് മാസത്തിൽ ടോക്കിയോയിലെ ടോഡ-മേ മെട്രോ സ്റ്റേഷനിൽ കത്തിക്കുത്തിനെ തുടർന്ന് 43കാരനെതിരെ കൊലപാതകശ്രമത്തിന് കേസെടുത്തിരുന്നു.
